ОТАМ-ОНАМ ДЕЙДИ-ДА

Болам-болам деяпсан,
Боланг «болам» дейди-да.
Кеч бўлганда одамлар,
«Отам-онам» дейди-да.
Боласи деса «болам»,
Ўзгариб қолар олам.
Вақтлар ўтганда одам,
«Отам-онам» дейди-да.
Болам дея ташвишнинг,
Чўғин ютар турмишнинг.
Қадри ўтиб ўтмишнинг,
«Отам-онам» дейди-да.
Ортга қайтиб бўлсайди,
Буни ҳар ким хоҳлайди.
Минг пушаймон оҳлайди,
«Отам-онам» дейди-да.
Умр тугаб борганда,
Эътибордан қолганда.
Хатосини билганда,
«Отам-онам» дейди-да.
Жондан азиз, энг яқин,
Одамлари, йўқ қийин.
Бу дунёда энг ширин,
«Отам-онам» дейди-да.
Болам-болам деяпсан,
Боланг «болам» дейди-да.
Кеч бўлганда одамлар,
«Отам-онам» дейди-да.
Рустам Пирназар