Таче шке кугу пайремжым – 75 ияш лӱмгечыжым, пайремла Елизавета Никоноровна Волкова.

Тыланена Елизавета Никоноровналан пенгыде тазалыкым, илышыште да коштмо корнышто — пиалым. Йолгорно гай кужу ӱмырым, шошо леве мардеж гай куштылго кап-кылым, памаш вӱд гай яндар шӱм-чоным. Тек шӱм-чонетым кече эреак ырыкта. Ласкалык дене илыш вийым пуэн шога. Илышет лийже муро гае йоҥгыдо, кече гае волгыдо, вурс гае пенгыде, пеледыш гае эреак сӧрал. Пеленет эреак тыйым пагалыше да йоратыше, умылен моштышо да полшен шогышо лишыл еҥет-влак лийышт.
Елизавета Никоноровна 1951 ий 18 февральыште Куженер район, Кугу Лаждӱр ялыште шочын. Кыдалаш школым тунем пытарымек, Мари Турек селаште идалыкащ курсышто бухгалтерлан тунем лектын. Лаждӱр ялыштак ешым поген, ныл шочшым ончен куштен, йол ӱмбак шогалтен. Сулен налме канышыш лекмеш «Рассвет» колхозышто пашам ыштен, «Пашан ветеранже» лӱмым сулен налын. Ялысе ӱдырамашын паша шуко, но жапым муын «Марий сем» ансамбльыш коштын, да кызытат кертме семын Кугу Лаждӱр клублан кумылын полша. Шочмо кечет, чапле юбилеет дене Елизавета Никоноровна!!!