СЕВГИМ МОЗОРИ
Севгимни ўлдириб кўмган ўзинг-ку,
Ўзинг-ку устига қўйган совуқ тош.
Сўнг тубсиз ҳасратга чўмган ўзинг-ку,
Ўзинг-ку сўнг куйиб юм-юм тўккан ёш.
Севгим мозори дўнг, бир уюм тупроқ
Устини аёвсиз босиб турибди.
Сендан кўра унга яқин, маҳбуброқ
Ёнида тиконлар ўсиб турибди.
Шамол увлар, гўё бадбахт толега
Терс турган бир қалбнинг ўкинчи, зори.
Ишонмай умрнинг ёлғон фолига
Дўмпайиб турибди Севгим мозори.
Ҳаммаси тугади, аччиқ аламдин
Фойда йўқ, барибир ўлган тирилмас.
Умид қилма энди қудсий карамдин,
Бой берилган толе қайтиб берилмас!
1986 йил
Комментарии 6
Таваллуд айёмингиз муборак бўлсин!
Атрофимиз келинчакдек яшнаб, уйқудан уйғонган дарахтлар оппоқ бодроқдек гуллаб, қизлар ҳам кўзни қамаштириб ястаниб, юртимизда Наврўз шукуҳи юракларни ҳапқиртириб, дошқозонларда ширин сумалак биқирлаб қайнаб, булбуллар севги изҳори мисол сармаст бўлиб сайраб кўнгилларни хушнуд қилган шундай гўзал кунда дунёга келган экансиз, илоҳим, қалбингиз ҳам доимо шундай жўшқин, умрингиз узоқ ва сермазмун, кўнглингиз оппоқ ўрик гулларидек чароғон бўлсин доимо!!!
Фарзандлар камолини кўриб, шогирдлар ютуғидан мағрурланиб хурсанд бўлиб, шеърсевар халқимиз дардига малҳам бўлгувчи элимиз гуллаб яшнашига туртки бўлгувчи оташин шеърлар ёзиб чарчаманг, Устоз....
Сизни ҳеч қачон бахт, омад, шодлик ва илҳом парилари тарк этмасин!!!